22 Nisan 2018 Pazar

zp tr

BU ALIMIZĞA BAYRAM KELIŞIRMI?

YANI DÜNYA GAZETESİ

YANI DÜNYA GAZETESİ

E-Posta : dunya04@mail.ru

BU ALIMIZĞA BAYRAM KELIŞIRMI? 

Cemile SULEYMAN
Aqmescit ş.
Ürmetli vatandaşlar, bu satırlarnı yazmağa meni aprel 13 künü ATR kanalında aqşamki "Zaman"nıñ bergen haberi mecbur etti. Kergin siyasiy haberler sırasınıñ soñki reportajı Aqmeçit qasabasından olıp, onda keçenlerde yüz bergen vaqia añıldı, yani 14 yaşındaki ösmürimizni ana tilinde laf etkeni içün köteklep yaralağanları aqqında ikâye etildi. Bu meseleni ta Prezidentke yetkizmek qararlaştırılğanı aqqında haber etilgen soñ, diktor: "Amma ömür devam ete", – diye Hıdırlez bayramınıñ yaqınlaşqanını ve yaqın vaqıtta Qırımda Hıdırlez bayramı qayd etilecegini bildirdi. Bu vaziyet menim – bir qızı ve eki oğlu olğan ananıñ yüregini, dersiñ, pıçaqnen yaraladı. Aceba, içimiz-bağrımız yanğan künlerde, evimizde saba qavesinden başlap cenaze merasimine barğanca yalıñız bugünki pek mürekkep al-vaziyetimizni tüşüngen insanlarımız insultlardan, yürek ağrılarınen hastahanelerge tüşken bir vaqıtta, biz Hıdırlezni qayd etecek olsaq, bu ekiyüzlülik, namussızlıq olmazmı?! Meni doğru añlañız, elbet, ömür devam ete, ve şunıñ içün er birimiz künde yüz biñ kere Allağa şükürler etemiz. Yaşlarımız evlensin – toylar olsun, balaçıqlar doğsın – toylar yapayıq, amma bütün halqnı toplap, ükümet adamlarını sanağa çıqarıp, olarnıñ aytqan sözlerini özümizge diñlettirmek nasıl olur eken? Fikirimce, bu yıl Hıdırlez-Sabantuylardan çetleşip, yırcılarımıznıñ seslerini, yırlanğan halq yırlarını teatr zallarında, vaziyetke kelişken tavurnen diñleyik. Halqımıznıñ manalı yırlarından özümizge yaşamaq içün küç-quvet alayıq. 18 mayısnıñ büyük matem kününi olduqça yüksek, munasip derecede qayd eteyik.
Halqımız şeñlikniñ de, kederniñ de qıymetini pek yahşı bilgen, ağır-sabır, yapacaq areketini abul-qubul degil de, yedi ölçep bir kesmege bilgen bir millettir. Quvançlı kününde olsun, kederli kününde olsun, qarşısına çıqqan "bir kimseler" "mubareklerde vatanlar" teklif etkende halqımız könmegen, satılmağan edi. Ep ğayesine, maqsadına irişmege tırıştı. Yetekçilikni, yolbaşçılıqnı ise milletiniñ ğayesine sadıq olğan ziyalılar öz boynuna alğan ediler. Milletniñ taqdirini bazirgânlarğa qaldırmağanlar, qalsa edi… Alla milletimizni bu künge qadar ğayeli, vatanperver oğul ve qızlarından marum etmedi. 
Milliy areketimiz tarafından soñki 70 yıllıq tarihı devamında yapılğan işler bugün yaşağan er bir vatandaşıma yalıñız şan ve şüret, ğurur ve eminlikni duydurdı. Bu duyğularnen yaşap kelgenimiz içün üyken nesil ögünde sıñırsız minnetdarlığımıznı bildiremiz. Lâkin bir baqıştan balalıqtan tabiiy olğan duyğularnıñ aqiqiy qıymeti endi añlaşılacaqqa oşay. 
Yaşayatqan acınıqlı devirimizniñ soñki on beş-yigirmi künü devamında Qurultay ve Meclis tarafından saylanğan siyasiy yöneliş ve ATR kanalı tarafından insanlarımıznıñ añına pekiteleyatqan bu siyasiy noqtaiy-nazar şahsen meni raatsızlay. Ağır ve mürekkep vaziyet olmasına baqmadan, fikir etmege daa yorulmağan, evlâtlarınıñ kelecegini qayğırğan, balalarınıñ istiqbalini Qırımnen ve qırımtatarlarnen bağlanmasını istegen vatandaşlarımıznı tez vaqıt içinde deñiştirilgen siyasiy vektor raatsızlaydır, dep belleyim. Daa yaqın tarihımızda bizlerni kollabortsionizm ve satqınlıqta qabaatlap keldiler, lâkin biz bu qabaatnı, bir millet olaraq, iç de boynumızğa almadıq. Ekinci cian cenkinde bazı şahıslar, vaziyetke köre, sovetler ya da almanlarnen işbirlik yapıp, canını saqladılar, ya da elâk oldılar. Lâkin iç bir kimse asılında qırımtatar milletini kollabortsionizmde qabaatlı yapamaz. Amma şimdi bütün cianda ve, eñ müimi, halqımız arasında milletni temsil etken, millet adından areket etken arqadaşlarımız, daa yaqında, işğalci kibi qabul etilgen küçlernen bugün işbirlik eteler. Aqılğa yatmağan bir şey.
Er bir cemiyette: olsun musulman, olsun hristian, olsun ateist cemiyetlerde ve bilhassa, tarihı ve medeniyeti zengin olğan insan cemiyeti içinde er zaman duşmanğa munasip munasebetni köstergen halqlar ürmet qazana bilgenler. Bundan tış iç bir areket aqlanılmağan, elbet, ölüm havfından ğayrı.
Bu satırlarda ifade olunğan fikirler çoq semetdeşlerimnen olıp keçken subetler, sual cevaplardan asıl olğan fikirlerden ibarettir. Kerçek, fikirler yañı degil, insanlıqnıñ özü kibi qadimiydirler. Amma milletniñ ğayesi ve maqsadları siyasiy alış-verişte ortağa tikilse, bu ğayeler ve maqsadlarnıñ bir malğa çevirilmek havfı peyda ola.


17 Nisan 2014 Perşembe 14:37
Yazdır

YORUM EKLE

Yorum Başlığı

Yorum

YORUMLAR

  • Bu habere henüz yorum yapılmamış. İlk yorum yapan siz olun.

RUSÇA DERS

ÇOK OKUNANLAR

  • Haber bulunamadı

  • Haber bulunamadı

  • Haber bulunamadı

ANKARA - HAVA DURUMU

ANKARA